काठमाण्डौ, २९ भदौ, २०८१
नेपालको घरेलु क्रिकेटमा उत्कृष्ट प्रदर्शन गर्दै आएका स्टार अलराउण्डर दिपेन्द्र सिंह ऐरी नेपाल प्रीमियर लिग (NPL) मा सुदूरपश्चिम टीमबाट खेल्ने भएका छन्। नेपाल क्रिकेट संघले आज गोलाप्रथाबाट मार्की खेलाडीहरूको टुंगो लगाएसँगै NPL को तयारीलाई तीव्रता दिएको छ। यसअघि ८ जना मार्की खेलाडीहरू छानिए पनि उनीहरू कुन टीमबाट खेल्ने हुन् भन्ने निर्णय आज मात्र भएको हो।
मार्की खेलाडीको रुपमा ऐरी सुदूरपश्चिम टिमका लागि खेल्ने छन्। अन्य मार्की खेलाडीहरूमा सन्दीप लामिछाने (बिराटनगर), रोहित पौडेल (लुम्बिनी), सोमपाल कामी (कर्णाली), करण केसी (काठमाण्डौ), कुशल भुर्तेल (पोखरा), आशिफ शेख (जनकपुर), र कुशल मल्ल (चितवन) परेका छन्। बाँकी खेलाडीहरूको छनोट भने आगामी अक्सनबाट टुंगो लाग्नेछ।
नेपाल प्रीमियर लिग, नेपालको क्रिकेट इतिहासमा पहिलोपटक आयोजना हुन लागेको ठूलो प्रतियोगिता हो। यसले देशभरका प्रतिभाशाली खेलाडीहरूलाई राष्ट्रिय स्तरमा खेल्न अवसर दिने अपेक्षा गरिएको छ।
